ऊ दिन, ऊ साँझ - गिर्जानन्दसिंह बिसेसर (अरविन्द)

ऊ दिन, ऊ साँझ

 गिर्जानन्दसिंह बिसेसर (अरविन्द)

कहाँ गइल ऊ दिन भैया, कहाँ गइल ऊ साँझ हो ?

चिरँय गावे, मीठा चहके, तब फजीरे किरिन फूटे,

मधवा बरसे कनवा भितरे, गाँव भर के सपना टूटे |

साँझे घामा तबे डूबे, जब चिरँया डाली पहुँचे

बैठ संघत सुर में अपन, सुखवा दुखवा मान बाँचे |

कहाँ गइल ऊ दिन भैया, कहाँ गइल ऊ साँझ हो ?

जीवन बाँधे रखे हमरो, बोल बिना गीत ऊ

बिसरा देवे सब दरदवा, ऐसन सच्चा मीत ऊ

अमवा के ऊ गाँछी में, अंगना के बसे प्रान हो

हमरो जिंगी ओलोग संगे, गावे एके तान हो

कहाँ गइल ऊ दिन भैया, कहाँ गइल ऊ साँझ हो ?

अंगना के ऊ हरियर गाँछ, आज गूँगा हो गइल बा

टूवर मान टुक-टुक देखेला, प्रान जैसे उड़ल बा

घामा उगेला आजो भैया, घामा डूबेला आजो हो

बासी लगेला अब किरिनवा, फजरो के आ साँझो हो

कहाँ गइल ऊ चिरँय भैया, कहाँ गइल ऊ गान हो ?

कहाँ गइल ऊ दिन भैया, कहाँ गइल ऊ साँझ हो ?